Wednesday, December 09, 2009

Sugilanon Ni Tita Linda


Tita Linda Belayro
Paskwa It Isaeang Ka Ilo
Naanad eon si Merlyn mag iping sa eoyo ko anang Lola. Bata pa imaw hay guin aywan eon imaw ko anang ina sa Lola. Guin aywan imaw agod magpasimpaead sa Manila. Ro anang Lola ro nagpa eskwela kana hasta nakatapos imaw sa elementary. Ro pangita ko anang Lola hay naga baligya it Sampaguita. Tongod sa magueang eon ro anang Lola, hapilitan imaw nga magpundo sa pagtuon ag magbaligya it Sampaguita sa mga terminal it bus ag sa puetahan it simbahan.

Bisperas it paskwa, una pa guihapon si Merlyn sa kalye. Kinahangean nga maubos nana it baligya ro Sampaguita agod ibakae nana it pang medya noche. Samtang nagatindog imaw sa kilid it simbahan, tinukob imaw it kamingaw ag kahidlaw sa anang ina nga indi nana matungkad. Hakita abi nana ro mga onga nga kaibahan ro andang nanay ag tatay nga pulos naga bit-bit it mga regalo.

Hadumduman nana ro hambae ko anang Lola hanungod kay Santa Claus. Sa malinghod nana nga paino-ino, anang guin pangutana ra anang dogalingon. Ham-an it indi nana pagsamitan nga mangayo kay Santa Claus nga magkita sanda ko anang ina? Sumueod imaw sa simbahan ag anang guin haead ro sangka kulentas sa altar para kay Niño Hesus ag nag pangamuyo.

Pagguwa nana sa simbahan, sa anang pagtabok, habunggu-an imaw it isaeang ka auto. Naduea-an imaw it pangalibutan. Pagbugtaw nana, idto eon si Merlyn sa ospital ag may mag-asawa nga naga bantay kana. Guin pangutana imaw ko anang pangaean ag kon siin imaw ga uli. Pagkabati ko babaye, golpe imaw nga hinakos. Imaw gali ro mabuhay eon nanang guina inusoy nga onga. Ro babaye ngato ro anang ina nga nag asawa man it uman. Ogaling owa sanda it onga ko anang hapangasawang Intsik nga milyonaryo. Mabuhay eon sanda nga naga sinimba nga mag asawa agod mag-pangamuyo para makakita it onga. Owa abi sanda it onga ko anang hapanga-sawang Intsik nga milyonaryo. Guin adtunan nanda ro andang dating guin estahan agod makahalin lat-a ro mag lola tongod owa eon sanda maka bayad ko andang renta sa baeay. Idto lang sanda mag estar sa isaeang ka lugar it eskwater agod makabaton it linabahan dugang sa andang kita.

Pagguwa ni Merlyn kaibahan ro anang ina nga nag uli sa andang baeay, nagkita ro mag ina. Nangayo si Merlyn it patawad. Guin himos nanda ro andang mga igdaeapat ag guin tao sa mga kahilapit ro sarang mapuslan. Nag estar ro mag lola sa baeay ko ina ni Merlyn. Halin kato, malipayon eon ro paskwa ni Merlyn. Indi eon nana mabatyagan ro kasubo ag kahidlaw sa anang ina. Tongod sa anang panga-muyo kay Niño Hesus, guin sabat ni Santa Claus ro anang pangayo. /MP

No comments: